വേരില്ലാത്ത മരങ്ങൾ

വേരില്ലാത്ത മരങ്ങൾ

മതാനുയായികളുടെ
വേഷഭൂഷാദികൾക്കിടയിൽ
ആത്മീയത
ശ്വാസം മുട്ടി
പിടയുന്നു

വേരില്ലാത്ത
മരങ്ങൾ
ചെറിയ
കാറ്റിൽ പോലും
ആടിയുലയുന്നു !

ബന്ധങ്ങൾ

ബന്ധങ്ങൾ

അടുക്കുന്തോറും
അകലം
വർദ്ധിപ്പിക്കുന്നു
ചില ബന്ധങ്ങൾ

അഴിഞ്ഞു വീഴുന്ന
മുഖംമൂടികൾ
മതിലുകളായി
രൂപാന്തരപ്പെടുന്നു !

ചിരി

ചിരി

ഉമിക്കരിയുടെ
കാലത്ത്
ചിരിയിൽ
ഇത്രയും
മായം
കലർന്നിരുന്നില്ല

ഇപ്പോൾ
പതയിൽ
വെളുപ്പിച്ചെടുക്കുന്ന
ദന്തനിരയിൽ
ചതിയും
പതിയിരിക്കുന്നു !

മഴ

മഴ

ഹാ!
മഴയെ
പ്രണയിച്ചവൻ
അതാ
പ്രളയത്തിൽ
മുങ്ങി താഴുന്നു....

ഞാനോ, 
ചോർച്ച
നിൽക്കാൻ
നേർച്ച
നേരുന്നു...!

(ഷാർജയിലെ മഴയിൽ നിന്നും... - 2013 )

ആത്മദാഹം

ആത്മദാഹം

പടിയിറങ്ങിപ്പോയ
ആത്മീയതയെ
അങ്ങാടിയിൽ 
തിരയുന്നുണ്ട്
പുതുതലമുറയിലെ
തൊട്ടാവാടികൾ

ബീജം വഴി വന്ന മതം
അകതാരിലെവിടെയോ
പാദം കുഴഞ്ഞ്
കിടക്കുമ്പോൾ
വാതം പിടിപെട്ടിരിക്കുന്നത്
കുറുന്തോട്ടിക്കല്ല,

മതത്തിൽ
മായവും ചായവും ചേർത്ത്
കീശ വീർപ്പിക്കുന്ന
മുറിവൈദ്യന്മാർക്കാണ്!

ഒന്നുറപ്പാണ്,
പൊടി പിടിച്ചു
കിടക്കുന്ന ഗ്രന്ഥ-
ശേഖരങ്ങൾക്കിടയിലെ-
വിടെയെങ്കിലും
നിങ്ങൾ
ഒരു കിണർ
കണ്ടെത്താതിരിക്കില്ല !!

റെയിൽവേ സ്റ്റേഷൻ

റെയിൽവേ സ്റ്റേഷൻ

ലോകം
ഒരു 
റെയിൽവേ സ്റ്റേഷൻ

കാലം
നിശ്ചലമായ 
റെയിൽ പാളം

ജനനവും മരണവും
അവധിയില്ലാത്ത
രണ്ടു ട്രെയിനുകൾ

ഒന്നിൽ
ആഗമനം
ഒന്നിൽ
നിർഗമനം !

ചാവേർ

ചാവേർ

സിഗററ്റ്
ഒരു ചാവേറാണ് !

കാവിയും വെള്ളയും ധരിച്ച
മതേതരനായ ചാവേർ

മരിക്കാൻ വേണ്ടി
മാത്രം നിയോഗിക്കപ്പെട്ടവൻ

ആരുടെയോ തിരിനാളത്തിനാൽ
സ്വയമെരിഞ്ഞ് തീരുമ്പോഴും
ഇരയുടെ കുരുതിയിൽ
ആത്മ നിർവൃതിയടയുന്നവൻ

ഒരു തരത്തിൽ
ചാവേറുകളും
ആരൊക്കെയോ
തിരികൊളുത്തിയ
സിഗററ്റുകളാണ് !

ആത്മഹത്യ

ആത്മഹത്യ

ഉള്ളം
പൊള്ളിയവന്റെ
ഉഷ്ണം,

വിഷം
കഴിച്ച്
മോർച്ചറിയിലെ
ഫ്രീസറിൽ
വെച്ചപ്പോഴത്രേ
ശമിച്ചത് !

"ഫെയ്ക്ക് ഐഡി മിത്രങ്ങളുടെ ശ്രദ്ധയ്ക്ക്"

"ഫെയ്ക്ക് ഐഡി മിത്രങ്ങളുടെ ശ്രദ്ധയ്ക്ക്"

ഫെയ്ക്കുകളേ..,
നിങ്ങൾ
എനിക്ക്
ബലിക്കാക്കകൾ
പോലെയാണ് !

ഉറ്റവരിൽ
ആരുടെ
ആത്മാവാണ്
നിങ്ങളിൽ
സന്നിവേശി-
ച്ചിരിക്കുന്നതെന്നറിയാതെ,
ഞാൻ
നിങ്ങൾക്ക്
ഇന്നും,അന്നം
നൽകിക്കൊണ്ടിരിക്കുന്നു...!

ഫേസ്ബുക്ക് ജീവിതം

ഫേസ്ബുക്ക്  ജീവിതം 

മതങ്ങൾ
മതേതരത്വത്തിൽ
മുങ്ങിച്ചത്ത്
നിരീശ്വരത്വമായ്‌
പുനർജനിക്കുന്നു !

ജീവിത
നൈരാശ്യവുമായ്
നിഷേധത്തിന്റെ
വിരൽതുമ്പുകൾ
മരണം കാത്ത്
കീബോർഡിൽ
കിടക്കുന്നു !

ലൈക്കിനും
കമെന്റിനും
പണയം വെച്ച്,
ക്രമീകരിക്കപ്പെട്ട
മസ്തിഷ്കങ്ങളിൽ
ഇഴയുന്നു
ഈ ഫുദ്ധിജീവിതം..!!

മതവും മതചിഹ്നവും

"മതവും മതചിഹ്നവും" 

മത ചിഹ്നങ്ങൾ
വാരിപ്പുതച്ചവരുടെ
മദപ്പാടുകൾ
നോക്കിയാണ്
അവർ
മതങ്ങളെ
കല്ലെറിയുന്നത് !

ഓർക്കുക!,
എല്ലാ മനുഷ്യരും
ശരീരത്തിൽ
വിസർജ്ജ്യം
വഹിക്കുന്നവരാണ് !!

മദ്യം വിഷ (യ) മാണ് ...!

മദ്യം വിഷ (യ) മാണ് ...!

കുപ്പിയിലെ

വീര്യമാണ്

വരികളിലേക്ക് 

പകർന്നതെന്ന്

ഒരു കവി !

കുടിച്ചവനെക്കാൾ

മത്ത് പിടിച്ചത്

വായിച്ചവനത്രേ !!

തിരിച്ചറിവ്

തിരിച്ചറിവ്

അവൻ
ദൈവത്തെ
തിരഞ്ഞ് നടന്നു

ദൈവം
അവന്റെ
പിറകിൽ
നടന്നു

മരണം
അവനെ
വഴിയിൽ
തടഞ്ഞു

ദൈവം
മുന്നിലും
അവൻ
പിന്നിലും
നടന്നു !!

കയർ പ്രേമികളോട്..!

കയർ പ്രേമികളോട്..!

" ഇന്നലെ
ഭൂമിയെ 
മടുത്ത
ഒരുവൻ 
ഒരു മുഴം
കയറിൽ
കയറി
ആകാശത്തേക്ക് പോയെന്ന് ! "

" ഇന്ന്
അവന്
തിരികെ
വരാൻ
നീളമുള്ള
കയറോ
അമ്മയുടെ
വയറോ
മതിയാകുന്നില്ലെന്നും !! "

"മഴ പ്രാർത്ഥനകൾ"

"മഴ പ്രാർത്ഥനകൾ"

തിന്മകളാൽ
വരണ്ടുണങ്ങിയ
തൊണ്ടകളിൽ
നിന്നും
മുകളിലേക്ക്
പോയിട്ടുണ്ട്
കുറേ
"മഴ പ്രാർത്ഥനകൾ" !

വരും
പേമാരി
വരും !!

ഭ്രാന്തൻ

ഭ്രാന്തൻ

ഓർമ്മയും
മറവിയും
ഒരേ രാഗത്തിൽ
ഈണമിട്ട്
നിയന്ത്രിച്ചിരുന്ന,
മനസ്സിന്റെ
താളം
ഒരു വരി
പിഴച്ചപ്പോൾ...

പിന്നെ
അവനെ
നിയന്ത്രിച്ചത്
സ്വന്തക്കാർ
കാലിലണിയിച്ച
ചങ്ങലയുടെ
താളമായിരുന്നു!

എല്ലാ സ്വപ്നങ്ങളും
ചങ്ങലയിൽ
തളച്ചിട്ട
അന്നു രാത്രി,
ഇരുട്ടറയിൽ
തള്ളപ്പെട്ട
അവന്റെ
കട്ടിലിൽ
വീട്ടിലെ പട്ടി
മുള്ളിയത്രേ !!!

മതങ്ങൾ

മതങ്ങൾ


ഗ്രന്ഥങ്ങളിലെ
വരികൾക്കിടയിൽ
സ്നേഹവും കാരുണ്യവും
ഒളിഞ്ഞിരിക്കുന്നു

അവർ മഷിയിലെ
വിഷം മാത്രം
കുടിക്കുന്നു,
ഛർദ്ദിക്കുന്നു !

മതം മടുപ്പിക്കുന്ന
മണം പാരിൽ 
വീശിയടിക്കുന്നു 

ദൈവം
തേങ്ങി തേങ്ങി
കരയുന്നു
ഭൂമി പിടിച്ച് കുലുക്കുന്നു !

മഞ്ഞ സിഗ്നൽ

മഞ്ഞ സിഗ്നൽ

പണക്കൊഴുപ്പ്
അന്യന്റെ വിയർപ്പിൽ 
ഉരുക്കിയൊഴിച്ചുണ്ടാക്കിയ
റബറൈസ്ഡ് റോഡിൽ

അഹങ്കാരം
കുത്തിനിറച്ച
കുഷ്യൻ സീറ്റിലിരുന്നു
ദുനിയാവിന്റെ
വളയം പിടിക്കുന്നവന്,

വഴിയോരക്കാഴ്ച്ചകളുടെ
നിറപ്പകിട്ടിൽ
അന്ധത ബാധിച്ചപ്പോൾ

പച്ചക്കും ചുവപ്പിനുമിടയിൽ
സൂക്ഷിക്കേണ്ടിയിരുന്ന 
മഞ്ഞ സിഗ്നൽ
കാണാൻ കഴിഞ്ഞത്,
അടഞ്ഞ കണ്ണുകൾക്ക്
മുകളിൽ വീണ 
വെളുത്ത തുണിയിലാണ്  !!!

ഗൃഹ പ്രവേശം

ഗൃഹ പ്രവേശം



മകനേ,
ഇപ്പോൾ
ഞങ്ങൾ
പുതിയ വീട്ടിലാണ്!

നീ
പണിതു തന്ന
ജനലുകളുള്ള
ഖബറിൽ ഞങ്ങൾ
ഉറങ്ങാതെയുറങ്ങുന്നു!

നീയോ
ഞങ്ങൾ പണിതു
തന്ന ജനലുകളില്ലാത്ത
വീട്ടിൽ
ഉണരാതെയുറങ്ങുന്നു !

ഉറക്ക ഗുളിക

ഉറക്ക ഗുളിക

ഉറക്ക ഗുളികയുടെ
കണക്ക് തെറ്റിയപ്പോള്‍
ഉറക്കം നഷ്ടമായത്
ഉറ്റവര്‍ക്കായിരുന്നു

ഇനിയുമുണരാത്തവന്റെ
കണ്‍പോളകളില്‍ 
കണ്ണും നട്ട് 
കരളുരുകി
കാത്തിരിക്കുകയാണവര്‍!

സ്വഹാബികളും 'സാഹിബുകളും'

സ്വഹാബികളും 'സാഹിബുകളും'

'പ്രവാചകരെ
അങ്ങയുടെ
അനുചരന്മാര്‍
നക്ഷത്രങ്ങളായിരുന്നു'

ഞങ്ങളോ,
കര്‍മ്മശാസ്ത്രത്തിന്റെ
പഴുതുകള്‍ തേടുന്ന
മിന്നാമിനുങ്ങുകളും ! 

അമ്മയും മകനും

അമ്മയും മകനും

അമ്മയിലെ വാശി
അവനിലേക്കാഞ്ഞൊന്നു വീശി !

തണലായിരുന്ന
പ്രണയമരം
മറിഞ്ഞുവീണതും,
ചതഞ്ഞരഞ്ഞതവന്റെ
ഹൃദയവും പ്രതീക്ഷയും

ഇന്നിപ്പോള്‍
പൊള്ളുന്ന വെയിലിലവനും
കണ്ണീര്‍മഴയിലമ്മയും!

വസ്ത്രാ'ക്ഷേപം'

വസ്ത്രാ'ക്ഷേപം'

മനുഷ്യത്വം അസ്തമിച്ച
പാതയോരങ്ങളിലൂടെ,
ഇമ വെട്ടാതെ
തുറന്നു പിടിച്ച
നിയമക്കണ്ണുകളുടെ 
പ്രകാശത്തില്‍
വിവസ്ത്രയായി 
അവള്‍ നിര്‍ഭയം
വിഹരിച്ചു

ക്ഷുദ്ര ജീവികളുടെ
കാമറക്കണ്ണുകള്‍
കാമം
കരഞ്ഞു തീര്‍ത്തു !

നിയമം കണ്ണുകളടച്ച് 
കറുത്ത തുണിയുമിട്ട്-
മൂടിക്കെട്ടിയ,ഇരുട്ടില്‍
അടിപ്പാവാടയും 
അവള്‍ക്കൊരു
പടച്ചട്ടയായി
അനുഭവപ്പെട്ടു !

വീട്

വീട്

അഹങ്കാരപ്പെരുമഴയില്‍
ചോര്‍ന്നൊലിക്കുന്ന
ആത്മാവിന്റെ
മേല്കൂരക്ക്
താഴെ നിന്ന് കൊണ്ടാണ്,

അവന്‍
മീസാന്‍ കല്ലും
പണയം വെച്ച് ,
അയല്‍ക്കാരന്റെ
വീട് മറയുന്ന
ഇരുനിലമാളിക
പണിഞ്ഞത് !

പ്രേതഭയം?

 പ്രേതഭയം?

ഊഹം കൂരിരുള്‍ നിറച്ച
ഭയത്തിന്റെ 
നിലവറകള്‍ക്കുള്ളിലേക്ക്,
ബോധത്തിന്റെ വിളക്കില്‍
ധൈര്യത്തിന്റെ എണ്ണയുമൊഴിച്ച്
ഞാന്‍ കടന്നു ചെന്നു

ഭ്രമത്തില്‍ തീര്‍ത്ത
ഭയത്തിന്റെ മുഖംമൂടി,
യാഥാര്‍ത്ഥ്യത്തിന്റെ
കരിങ്കല്‍ തറയില്‍
വീണുടയുന്നത് കണ്ടത്
അപ്പോഴായിരുന്നു !

മോര്‍ച്ചറിയുടെയും
ശ്മശാനത്തിന്റെയും
കാവല്‍ക്കാര്‍ക്ക്,
കൂലിയൊന്നും കൊടുക്കാതെ
എന്നിലുള്ള പ്രേതഭയത്തിന്റെ
അതിര്‍ത്തി സൈന്യമാക്കിയതും
അന്ന് മുതല്‍ക്കായിരുന്നു!

(വാ)നരൻ?

(വാ)നരൻ?

ദൈവമെന്ന യജമാനന്‍
കാലമെന്ന സര്‍ക്കസ് കൂടാരത്തില്‍
വിധിയുടെ കളിക്കളങ്ങള്‍ വരച്ച്,
ആയുസ്സിന്റെ കയര്‍കുരുക്കുമിട്ട് 
കാണികള്‍ക്കായി
ചാടിക്കളിപ്പിക്കുന്ന
വെറും കളിക്കുരങ്ങല്ലേ മനുഷ്യന്‍ ?

വികൃതി കൂടുതലുള്ള ദൈവം
പാമരനായ മനുഷ്യന്
ഓര്‍മയെക്കാള്‍ കൂടുതല്‍
മറവി കൊടുത്താണ്,
ശരീരത്തിന്റെ
മാലിന്യ കവാടങ്ങള്‍ തന്നെ
ഭോഗേന്ദ്രിയങ്ങളായി വിധിച്ചത് !

ഇരവും പകലും
ഇരയും തേടി
ഇരുകാലുകളിലായ്‌
അലയുന്നുണ്ടവര്‍,
നാല്‍ക്കാലികളെയും
നാണിപ്പിച്ച് !

ഇല്ല ,ഡാര്‍വിന്‍! ,നിനക്ക് തെറ്റ് പറ്റി
ഞങ്ങള്‍ ഇനിയും പരിണമിച്ചിട്ടില്ല,
വാലില്ലെന്നേയുള്ളൂ !!!

സ്വര്‍ഗ്ഗം

സ്വര്‍ഗ്ഗം

സ്വര്‍ഗ്ഗത്തിന് ഭാരം കൂടുതലാണെന്ന് ദൈവം !
ദുനിയാവിന്റെ ചുമടുകള്‍ താങ്ങി, എന്റെ
നട്ടെല്ല് വളഞ്ഞു പോയെന്നു ഞാനും !

എല്ലാം കിട്ടുമെന്ന് പറയുന്ന 
ചൈനാ മാര്‍ക്കറ്റില്‍
നാളെയൊന്നു പോകണം...

വളവില്ലാത്തൊരു നട്ടെല്ല് കിട്ടുമോ
കൂട്ടരേ ,
കടമായിട്ടെങ്കിലും....?