Tuesday, April 30, 2013

മതങ്ങൾ


മതങ്ങൾ


ഗ്രന്ഥങ്ങളിലെ
വരികൾക്കിടയിൽ
സ്നേഹവും കാരുണ്യവും
ഒളിഞ്ഞിരിക്കുന്നു

അവർ മഷിയിലെ
വിഷം മാത്രം
കുടിക്കുന്നു,
ഛർദ്ദിക്കുന്നു !

മതം മടുപ്പിക്കുന്ന
മണം പാരിൽ 
വീശിയടിക്കുന്നു 

ദൈവം
തേങ്ങി തേങ്ങി
കരയുന്നു
ഭൂമി പിടിച്ച് കുലുക്കുന്നു !


Sunday, April 28, 2013

മഞ്ഞ സിഗ്നൽ



മഞ്ഞ സിഗ്നൽ


പണക്കൊഴുപ്പ്
അന്യന്റെ വിയർപ്പിൽ 
ഉരുക്കിയൊഴിച്ചുണ്ടാക്കിയ
റബറൈസ്ഡ് റോഡിൽ

അഹങ്കാരം
കുത്തിനിറച്ച
കുഷ്യൻ സീറ്റിലിരുന്നു
ദുനിയാവിന്റെ
വളയം പിടിക്കുന്നവന്,

വഴിയോരക്കാഴ്ച്ചകളുടെ
നിറപ്പകിട്ടിൽ
അന്ധത ബാധിച്ചപ്പോൾ

പച്ചക്കും ചുവപ്പിനുമിടയിൽ
സൂക്ഷിക്കേണ്ടിയിരുന്ന 
മഞ്ഞ സിഗ്നൽ
കാണാൻ കഴിഞ്ഞത്,
അടഞ്ഞ കണ്ണുകൾക്ക്
മുകളിൽ വീണ 
വെളുത്ത തുണിയിലാണ്  !!!


Saturday, April 27, 2013

ഗൃഹ പ്രവേശം

ഗൃഹ പ്രവേശം



മകനേ,
ഇപ്പോൾ
ഞങ്ങൾ
പുതിയ വീട്ടിലാണ്!

നീ
പണിതു തന്ന
ജനലുകളുള്ള
ഖബറിൽ ഞങ്ങൾ
ഉറങ്ങാതെയുറങ്ങുന്നു!

നീയോ
ഞങ്ങൾ പണിതു
തന്ന ജനലുകളില്ലാത്ത
വീട്ടിൽ
ഉണരാതെയുറങ്ങുന്നു !


Wednesday, April 17, 2013

ഉറക്ക ഗുളിക

ഉറക്ക ഗുളിക


ഉറക്ക ഗുളികയുടെ
കണക്ക് തെറ്റിയപ്പോള്‍
ഉറക്കം നഷ്ടമായത്
ഉറ്റവര്‍ക്കായിരുന്നു

ഇനിയുമുണരാത്തവന്റെ
കണ്‍പോളകളില്‍ 
കണ്ണും നട്ട് 
കരളുരുകി
കാത്തിരിക്കുകയാണവര്‍!


Thursday, April 11, 2013

സ്വഹാബികളും 'സാഹിബുകളും'

സ്വഹാബികളും 'സാഹിബുകളും'


'പ്രവാചകരെ
അങ്ങയുടെ
അനുചരന്മാര്‍
നക്ഷത്രങ്ങളായിരുന്നു'

ഞങ്ങളോ,
കര്‍മ്മശാസ്ത്രത്തിന്റെ
പഴുതുകള്‍ തേടുന്ന
മിന്നാമിനുങ്ങുകളും ! 


അമ്മയും മകനും

അമ്മയും മകനും



അമ്മയിലെ വാശി
അവനിലേക്കാഞ്ഞൊന്നു വീശി !

തണലായിരുന്ന
പ്രണയമരം
മറിഞ്ഞുവീണതും,
ചതഞ്ഞരഞ്ഞതവന്റെ
ഹൃദയവും പ്രതീക്ഷയും

ഇന്നിപ്പോള്‍
പൊള്ളുന്ന വെയിലിലവനും
കണ്ണീര്‍മഴയിലമ്മയും!