നുറുങ്ങുകൾ -21

നുറുങ്ങുകൾ -21

വർണ്ണവിവേകം  

കറുപ്പാകട്ടെ
വെളുപ്പാകട്ടെ,

തൊലിയോളം വിലപിടിപ്പുള്ള
വസ്ത്രമേതുണ്ട്?!

**************************************

ദൈവം 

നിശബ്ദതയെ സാക്ഷി നിർത്തി
ചോദിക്കൂ!,
നീയില്ലെങ്കിൽ പിന്നെ
ഞാനാരാണ്?

******************************************

ഉറക്കം 

ഉറങ്ങുമ്പോൾ
ശരീരമഴിച്ചുവെച്ച്
നാം എവിടെ
പോകുന്നുവെന്ന്
ചിന്തിച്ചിട്ടുണ്ടോ!?

********************************************

ശരീരം 

ശരീരവുമായി അത്രയങ്ങ് ചങ്ങാത്തം വേണ്ട,
സമയമെത്തിയാൽ അത് നിന്നെ ഉപേക്ഷിക്കും;അല്ല,
നീ അതിനെ ഉപേക്ഷിക്കും!

നുറുങ്ങുകൾ -20

പ്രതികരണം

പ്രതികരിക്കണം 
എന്ന് തോന്നുമ്പോഴെല്ലാം 
ആ വാക്കിനുള്ളിലുള്ള 'പ്രതി'
എന്നെ കണ്ണുരുട്ടി പേടിപ്പിക്കുന്നു!.

**************************************

വേദന

വേദനയാൽ
മുദ്രണം ചെയ്ത
അനുഭവങ്ങളെല്ലാം
നിങ്ങളുടെ നിത്യസമ്പാദ്യമാണ്

മറവിക്ക് ഒരിക്കലും
അവയെ കവർച്ച ചെയ്യാൻ
സാധിക്കില്ല !

******************************************

ആത്മീയത

ഒച്ചയില്ലാതെ 
മിടിക്കുന്ന ഹൃദയങ്ങൾക്ക് 
കാതോർത്തിരിക്കുന്നവരെ , 
ഉച്ചഭാഷിണിയിലൂടെ 
നിങ്ങൾ എന്ത് 
കേൾപ്പിക്കാൻ!

********************************************

ജീവിതം

കണ്ണടച്ചാൽ ആത്മാവ് 
തുറന്നാൽ ദുനിയാവ് ,
ദൈവമേ 
ഇതിനിടയിൽ 
എവിടെയാണ് നീ 
ജീവിതത്തെ
ഒളിപ്പിച്ചു് വെക്കുന്നത് !

നുറുങ്ങുകൾ -17

ശ്മശാനം

കാതോർത്തു നോക്കൂ,
ശബ്ദ മുഖരിതമായ
ഒരു സമ്മേളനനഗരിയേക്കാൾ
മൂകമായ
ഒരു ശ്മശാനം
നമ്മോട് സംസാരിക്കുന്നുണ്ട് !
**********************************

തീവ്രം

ഉരുകിയൊലിക്കുന്ന
ഈ ജീവിതത്തിൽ നിന്നും
നീ തണുപ്പുള്ളതൊന്നും
പ്രതീക്ഷിക്കരുത് !
************************************

അഹം

മനസ്സിൽ
വീർപ്പിച്ചു വെച്ച
മസിലുമായി
ചിലർ ജീവിച്ചു
മരിക്കുന്നു !

************************************

ധാന്യപ്പുര 

ചിലപ്പോഴെല്ലാം
മനസ്സ് 
വെള്ളം കയറിയ 
ധാന്യപ്പുര പോലെ
ഉപയോഗശൂന്യമാണ് !

************************

നുറുങ്ങുകൾ -16

ആത്മപ്രശംസ 

സ്വയം പുകഴ്ത്തി പുകഴ്ത്തി
ഞാനും നീയും 
വാഴ്ത്തപ്പെടുകയല്ല,
വഞ്ചിക്കപ്പെടുകയാണ് !

*******************

കള്ളസത്യം 

വിശ്വാസികളെന്ന്
അവകാശപ്പെടുന്നവരുടെ
കള്ളസത്യങ്ങളിൽ നിന്നാണ്
ദൈവനാമത്തിനു മേൽ
ഇത്രയേറെ കറ
പുരണ്ടത് !

*******************

അനുഭവങ്ങൾ 

പരിചയത്തിൽ നിന്നും
ഒരു പരിചയുണ്ടാകുന്നു

അബദ്ധം
വഴിയെ 
സുബദ്ധമാകുന്നു !

നുറുങ്ങുകൾ -15

വാദം 

വാദിച്ച് വാദിച്ച് 
വാതം പിടിച്ചവരോട് 
വേദമോതിയോതി 
നിനക്ക് ദീനം പിടിക്കും !

******************************

വോട്ട് 

ചിഹ്നങ്ങൾക്കായുള്ള 
ചിന്നംവിളികളാകാം,
പക്ഷെ, മദമിളകരുത് !




******************************

ഗോമാംസം 

ഗോമാംസത്തിനല്ല 
ഭാരതീയാ,
ഇന്ന് 
ഭാരം കൂടുതലുള്ളത് 
പിച്ചവെച്ച് തുടങ്ങുന്നതു മുതൽ
പിച്ചിചീന്തപ്പെടുന്ന

സ്ത്രീമാംസത്തിനാണ് !

നുറുങ്ങുകൾ -4

മുറിവ് 

അറിവ് പുരട്ടി
ഉണക്കിയെടുക്കാവുന്ന
മുറിവുകളുമുണ്ട് !,
ചില തിരിച്ചറിവുകൾ
പച്ചമരുന്നിനേക്കാൾ
ഗുണം ചെയ്യുന്നു !!

***********************

സ്വപ്നം 

അനുഭവമായി തീരുന്നതോടെ
ഓരോ സ്വപ്നത്തിന്റെയും
മൂല്യം നഷ്ടപ്പെടുന്നു !

****************************

ജീവിതം

സന്തോഷത്തിന്റെ തുള്ളലിനും
സന്താപത്തിന്റെ തള്ളലിനുമിടയിൽ
അള്ളിപ്പിടിച്ചിരിക്കുന്നു
ജീവിതം!

നുറുങ്ങുകൾ - 14

ജീവിതം  

കരുതലോടെ കടിഞ്ഞാണിട്ട്
പിടിച്ചിട്ടും ജീവിതമെന്ന
കുതിര,
കുതറിയോടാൻ
ശ്രമിക്കുന്നു !
***********************************

ജീവിതത്തിന്റെ ദർപ്പണത്തിൽ നിനക്കെപ്പോഴാണ് മരണം പ്രതിബിംബിക്കാൻ തുടങ്ങുന്നത് ,
അന്ന് മുതൽ നീ ജീവിതത്തിന്റെ യഥാർത്ഥ സൌന്ദര്യം ദർശിക്കുന്നു !
***********************************


നീയറിയുന്ന ഏതൊരാൾ മരിക്കുമ്പോഴും കൂടെ നീയും മരിച്ചു കൊണ്ടിരിക്കണം, എങ്കിൽ പതിയെ പതിയെ നിന്റെ ജീവിതവും മരണവും പ്രയാസരഹിതമായി തീരുന്നു!.

നുറുങ്ങുകൾ - 13

ദൈവം 

ദൈവം വെളിച്ചമാണ്
ഇരുട്ടിൽ നിങ്ങളാണ് ,
ഇനിയും കാണുന്നില്ലെന്നോ?,
വിളക്ക് തെളിയിക്കാൻ
ഒരിത്തിരി തീ തിരയൂ !
****************************************


യൗവ്വനം അവന്റേതു മാത്രമായിരുന്നു
പക്ഷെ,
വാർദ്ധക്യം അവൻ ദൈവത്തിനു പകുത്തു നല്കി !
*****************************************



കരുതലും വിരുതും മാത്രം മതിയാവുന്നില്ല സ്നേഹിതാ, പരുപരുത്ത ജീവിതപാതയിൽ ഏകനായി നടക്കുമ്പോൾ ചുവടുകൾ പതറുമ്പോഴൊക്കെയും വീഴാതിരിക്കാൻ ആരോ ഒരാൾ കൂടെ നടക്കുന്നുണ്ട്. ഞാനും നീയും പലപ്പോഴും അതറിയുന്നുമുണ്ട്.
*****************************************

നുറുങ്ങുകൾ -3

വിശപ്പ് 

വിശക്കുമ്പോൾ

എല്ലാ ആശയങ്ങളും
ഉത്ഭവിക്കുന്നത്
ആമാശയത്തിൽ നിന്നാണ് !

******************************

അറിവ്  

നീ അറിവിന്റെ

മരങ്ങൾ തിരയുന്നു,
ഞാൻ അവയുടെ 
വേരുകൾ ചികയുന്നു!

************************

ദൂരം

ഇരു കസേരകളിലായി

അരികത്തിരുന്നുവെങ്കിലും,
ഞങ്ങൾക്കിടയിൽ
ഇരു കരകളുടെ
ദൂരമുണ്ടായിരുന്നു!

കാത്തിരിക്കുക,
കാലം നമുക്കിടയിൽ
ഒരു പാലം പണിഞ്ഞേക്കാം!

**************************

നുറുങ്ങുകൾ -5

മതം

ചിലർക്ക് മതം പുറമെ പുരട്ടാനുള്ള മരുന്നാണ്. 
ചിലർക്കോ, സർവ്വ രോഗങ്ങൾക്കുമുള്ള ഒറ്റമൂലിയും !

*********************************************************

വെളിച്ചം

നിങ്ങളിലേക്കുള്ള ജനലുകളും
വാതിലുകളും തുറന്നിടുക,
അറിവിന്റെ വെളിച്ചം
യഥേഷ്ടം പ്രവഹിക്കട്ടെ!,
ആ വെളിച്ചത്തിൽ
നിരന്തരം നിങ്ങളെ
പുതുക്കി പണിയുക,
അജ്ഞതയുടെ ഇരുട്ടറകളിൽ നിന്നും
മോചിതരാവുക !!

**********************************************

നിസ്സാരത

നിന്റെ 
നിസ്സഹായതയെയല്ല,
ചില സാഹചര്യങ്ങൾ
മനുഷ്യന്റെ 
നിസ്സാരതയെയാണ്
ചൂണ്ടി കാണിക്കുന്നത് ,
അതിനെ വിധിയെന്നോ
നിയോഗമെന്നോ
പേരിട്ടു വിളിക്കാം!

നുറുങ്ങുകൾ -6

ഹൃദയ ഘടികാരം

ജീവിതത്തിന്റെ തുടിപ്പിൽ നിന്നും
മരണത്തിന്റെ കിടപ്പിലേക്കുള്ള
സമയദൈർഘ്യം,
ഹൃദയ ഘടികാരം
അനുനിമിഷം 
നമ്മോട് വിളിച്ചുപറയുന്നുണ്ട് !
*************************************

പല്ല് വേദന

ഒരു പല്ല് വേദന പോലും
ചില നേരം, മനുഷ്യനെ
പുല്ലു പോലെ
ചവിട്ടിയരക്കുന്നു !
******************

സങ്കടം

ക്ഷമിക്കുക,
എന്റെയും നിന്റെയും
സങ്കടം
നാം, കണ്ണീരിനെ
സാക്ഷിയാക്കി
ദൈവത്തിന്
കൊടുക്കുന്ന
കടമാണ് !
****************

നുറുങ്ങുകൾ- 7

ചതി

ചതിയുടെ
മെതിയടിക്കടിയില്‍ പെട്ട്
ചതഞ്ഞവരുടെ
ചിതയ്ക്കരുകില്‍
ചകിതനായി ഞാന്‍ !
****************************

നാവും കാതും

നാവ് മൂര്‍ച്ച കൂ‍ട്ടുന്നതിലല്ല, 
കാത് കൂര്‍പ്പിച്ചു വെക്കുന്നതിലാണു കാര്യം!
*************************************************

സ്വാതന്ത്ര്യം  

സ്വതന്ത്രരാണ് എന്ന് എല്ലാവരും പറയുന്നു,
ചലിക്കാൻ തുടങ്ങുമ്പോഴായിരിക്കും 
നമ്മെ ബന്ധിച്ചിരിക്കുന്ന
സമൂഹത്തിന്റെ 
അദൃശ്യമായ ചങ്ങലകൾ
നാം ശ്രദ്ധിക്കുന്നത് !

നുറുങ്ങുകൾ- 8

കാഴ്ച്ച

ഒരു കാഴ്ച്ചയും വെറുതെയല്ല, ഓരോ കാഴ്ച്ചകളിൽ നിന്നും നമുക്കായി കരുതി വെച്ച ഓഹരി നാം കണ്ടെത്തുന്നില്ലെന്ന് മാത്രം!.

അറിവ് 

അറിവ് വർദ്ധിക്കുന്തോറും ചോദ്യങ്ങൾ കുറയുന്നുണ്ട്. പക്ഷെ, സങ്കീർണ്ണതകൾ കൂടുന്നു. എങ്കിലും,കുനിഞ്ഞ ശിരസ്സിനാൽ മൌനിയായിരിക്കുമ്പോഴും ഉള്ളിൽ ചിന്തകളുരസിയുണ്ടാകുന്ന വിസ്ഫോടനങ്ങളുടെ ഊർജ്ജത്തിൽ നിന്നു തന്നെയാണ് നാം നമ്മെ പുതുക്കി പണിയുന്നത്.

ജീവിതപാഠം  

അസഹ്യമായത്, അസാധ്യമായത് എന്നൊക്കെ നമുക്കിപ്പോൾ തോന്നുന്ന ഒരു കാര്യത്തെ നേരിടാൻ, അതിനോടടുക്കുന്ന സമയവും സാഹചര്യവും നമ്മെ പ്രാപ്തമാക്കിയേക്കാം. കടുത്ത പരീക്ഷണങ്ങൾ നിറഞ്ഞ ജീവിതപ്രതിസന്ധികളെ അതിജീവിച്ചവരുടെ വിജയഗാഥകൾ മാനവ ചരിത്രത്തിലുടനീളം കാണാം, 
സ്നേഹിതാ, മരണമല്ലാത്ത അനുഭവങ്ങളൊന്നും അവസാനത്തേതല്ല!.

നുറുങ്ങുകൾ- 9

മരണം

നിറങ്ങൾ 
അണിഞ്ഞു നിന്നിരുന്ന
ജീവിതത്തിനു മേൽ
മരണം
വെള്ള പുതപ്പിക്കുന്നു !

*************************

ആഘോഷങ്ങൾ

പഴകിയ
ജീവിതത്തെ
കഴുകിയെടുക്കുന്നു
ആഘോഷങ്ങൾ !

**********************

യുക്തി

ശ്മശാനങ്ങളുടെ
മൂകസാക്ഷിത്വം
മാത്രം മതിയായിരുന്നു
നിഷ്പക്ഷതയുടെ
കോടതിക്ക് 
യുക്തിയെ
മരണം വരെ
തടവിന് ശിക്ഷിക്കാൻ !

നുറുങ്ങുകൾ - 10

വിധി

പ്രാപഞ്ചിക തത്വങ്ങളുടെ
സങ്കീർണ്ണമായ
സൂത്രവാക്യങ്ങൾ
ഗ്രഹിക്കുന്നതിലല്ല;

വിധി വിളയാട്ടങ്ങളുടെ
കെട്ടിപ്പിണഞ്ഞു കിടക്കുന്ന
കൂട്ടക്ഷരങ്ങൾ
വായിച്ചെടുക്കുന്നതിലാണ്
നാം പലപ്പോഴും
പരാജയപ്പെടുന്നത് !

************************

പ്രവാസി

പാളത്തിലോടുന്ന വണ്ടികൾക്കേ താളം കാണൂ;
ചൂളം വിളിച്ചില്ലെന്നും വരാം
അരുത് , കയറാൻ ശ്രമിക്കരുത്!,
ഇത് ഭാവിയിലേക്ക്
സ്വപ്‌നങ്ങൾ ചുമക്കുന്ന
ചരക്കു വണ്ടിയാണ് !

******************************

മനസ്സ് 

നിറഞ്ഞ
ഗ്യാലറിയിലെ
ആരവങ്ങൾക്കിടയിൽ
ആവേശത്തോടെ
ഉരുണ്ടുകളിക്കുന്നു

ചിലപ്പോഴോ,
ആർപ്പുവിളികൾക്കിടയിലും
തീർത്തും
ഒറ്റപ്പെട്ട്
കാറ്റൊഴിഞ്ഞു
മൂലയിലിരിക്കുന്നു !

****************************

നുറുങ്ങുകൾ - 11

ഏകാന്തത

ഏകാന്തത ദൈവത്തിലേക്കുള്ള 
ഒറ്റവരിപ്പാതയാണ്!.

*****************************************

അന്ധത

വെളിച്ചത്തിൽ നിന്നും ഇരുട്ടിലേക്ക് കയറുമ്പോൾ നാം പെട്ടെന്ന് അന്ധത ബാധിച്ചവരെ പോലെയാവുന്നു. 
ഒരല്പം ക്ഷമിക്കുക,കാഴ്ച്ച വീണ്ടും തിരികെ വരുന്നത് കാണാം. 
ഇതു പോലെ തന്നെയാണ് ദുഃഖാവസ്ഥയും ,ക്ഷമയുണ്ടെങ്കിൽ ജീവിതം വീണ്ടും തിരികെ വരുന്നത് നാം കാണാതിരിക്കില്ല!
*******************************************

യുക്തി

യുക്തിയുടെയും യുക്തിരാഹിത്യത്തിന്റെയും കുറുകെ കെട്ടിയ നൂൽപാലമാണ് ജീവിതം. മരണത്തിലേക്ക് വീഴും വരെ നാം അതിലൂടെ അങ്ങോട്ടും ഇങ്ങോട്ടും സഞ്ചരിച്ച് കൊണ്ടിരിക്കുന്നു!
********************************************

വിധി

വിധിയുടെ കാറ്റിനാൽ നിയോഗങ്ങളിൽ നിന്ന് നിയോഗങ്ങളിലേക്ക് ചലിച്ചുകൊണ്ടിരിക്കുന്ന അപ്പൂപ്പൻതാടികൾ നാം !

നുറുങ്ങുകൾ - 12

വിയോഗം

ആണ്ടൊന്നു കഴിഞ്ഞെന്ന് !,
തുണയില്ലാതൊരു വടിയും
കാവൽക്കാരനില്ലാതൊരു വരാന്തയും
ശ്രോതാവില്ലാതൊരു റേഡിയോയും
വിരഹത്തിലാണ്ടു പോയിട്ടുണ്ട് !

***************

വിധി

കാറ്റിനെയും
കൊടുങ്കാറ്റിനെയും
അതിജീവിച്ചു,
പക്ഷെ
ഉരുൾപൊട്ടലിൽ
വേരറ്റുപോയി !

***************

യുക്തി

യുക്തിയുടെ വിശാലമായ ആകാശത്തിലേക്ക്
പറന്നുയരുന്ന പല പട്ടങ്ങളും
പൊട്ടി വീഴുന്നത്,
ദൈവവുമായി ബന്ധിച്ച നൂലിഴ
അറ്റുപോകുമ്പോഴാണ് !
******************************

മതം

പരാതി പറയരുത്
സ്നേഹിതാ,
ചിലരിലെ മതം
പാതിയും പതയാണ് !

ഗൃഹാതുരത്വം

ഗൃഹാതുരത്വം

വീടിനെ കുറിച്ച്
ചിന്തിച്ച് ചിന്തിച്ച്
അവൻ
ഒരു ചീവീടായി
മാറിയപ്പോൾ,
ഞാൻ 
അവനെ പിടിച്ച്
ഒരു തീപ്പെട്ടിക്കൂട്ടിലടച്ചു !

എന്നിട്ടും
ദേ,
അവൻ
കരച്ചിൽ നിർത്തുന്നില്ല !!

നുറുങ്ങുകൾ - 2

നുറുങ്ങുകൾ - 2 

വാക്കും പ്രവൃത്തിയും

വാക്കിനാൽ
മാനത്തേക്ക്
ഉയർന്ന്
നിൽക്കുന്ന
പലരും,
പ്രവൃത്തിയാൽ
അപമാനത്തിലേക്ക്
താഴുന്നുണ്ട് !

**************

പുഞ്ചിരി

വഞ്ചകർ 
പുഞ്ചിരിയിൽ
ഒളിപ്പിച്ച്
തൊടുത്തുവിട്ട
വിഷം
പുരട്ടിയ
അമ്പുകളാണ്
നെഞ്ചിൽ
ഏറ്റവും
ആഴത്തിൽ 
മുറിവേല്പിച്ചത് !

***************

കൂർക്കംവലി

ചിലർ
ഉറക്കിന്
നൽകേണ്ടി
വരുന്ന
വില !

**************

തലവര

ചിലരുടെ
വരികളിൽ
പലവുരി
തെളിയുന്നുണ്ട്
എന്റെ
'തലവര'