ആത്മദാഹം
പടിയിറങ്ങിപ്പോയ
ആത്മീയതയെ
അങ്ങാടിയിൽ
തിരയുന്നുണ്ട്
പുതുതലമുറയിലെ
തൊട്ടാവാടികൾ
ബീജം വഴി വന്ന മതം
അകതാരിലെവിടെയോ
പാദം കുഴഞ്ഞ്
കിടക്കുമ്പോൾ
വാതം പിടിപെട്ടിരിക്കുന്നത്
കുറുന്തോട്ടിക്കല്ല,
മതത്തിൽ
മായവും ചായവും ചേർത്ത്
കീശ വീർപ്പിക്കുന്ന
മുറിവൈദ്യന്മാർക്കാണ്!
ഒന്നുറപ്പാണ്,
പൊടി പിടിച്ചു
കിടക്കുന്ന ഗ്രന്ഥ-
ശേഖരങ്ങൾക്കിടയിലെ-
വിടെയെങ്കിലും
നിങ്ങൾ
ഒരു കിണർ
കണ്ടെത്താതിരിക്കില്ല !!
റെയിൽവേ സ്റ്റേഷൻ
ലോകംഒരു റെയിൽവേ സ്റ്റേഷൻകാലംനിശ്ചലമായ
റെയിൽ പാളം
ജനനവും മരണവും
അവധിയില്ലാത്ത
രണ്ടു ട്രെയിനുകൾ
ഒന്നിൽ
ആഗമനം
ഒന്നിൽ
നിർഗമനം !
ചാവേർ
സിഗററ്റ്ഒരു ചാവേറാണ് !കാവിയും വെള്ളയും ധരിച്ചമതേതരനായ ചാവേർ
മരിക്കാൻ വേണ്ടി
മാത്രം നിയോഗിക്കപ്പെട്ടവൻ
ആരുടെയോ തിരിനാളത്തിനാൽ
സ്വയമെരിഞ്ഞ് തീരുമ്പോഴും
ഇരയുടെ കുരുതിയിൽ
ആത്മ നിർവൃതിയടയുന്നവൻ
ഒരു തരത്തിൽ
ചാവേറുകളും
ആരൊക്കെയോ
തിരികൊളുത്തിയ
സിഗററ്റുകളാണ് !
ആത്മഹത്യ
ഉള്ളം
പൊള്ളിയവന്റെ
ഉഷ്ണം,
വിഷം
കഴിച്ച്
മോർച്ചറിയിലെ
ഫ്രീസറിൽ
വെച്ചപ്പോഴത്രേ
ശമിച്ചത് !
"ഫെയ്ക്ക് ഐഡി മിത്രങ്ങളുടെ ശ്രദ്ധയ്ക്ക്"
ഫെയ്ക്കുകളേ..,
നിങ്ങൾ
എനിക്ക്
ബലിക്കാക്കകൾ
പോലെയാണ് !
ഉറ്റവരിൽ
ആരുടെ
ആത്മാവാണ്
നിങ്ങളിൽ
സന്നിവേശി-
ച്ചിരിക്കുന്നതെന്നറിയാതെ,
ഞാൻ
നിങ്ങൾക്ക്
ഇന്നും,അന്നം
നൽകിക്കൊണ്ടിരിക്കുന്നു...!
ഫേസ്ബുക്ക് ജീവിതം
മതങ്ങൾ
മതേതരത്വത്തിൽ
മുങ്ങിച്ചത്ത്
നിരീശ്വരത്വമായ്
പുനർജനിക്കുന്നു !
ജീവിത
നൈരാശ്യവുമായ്
നിഷേധത്തിന്റെ
വിരൽതുമ്പുകൾ
മരണം കാത്ത്
കീബോർഡിൽ
കിടക്കുന്നു !
ലൈക്കിനും
കമെന്റിനും
പണയം വെച്ച്,
ക്രമീകരിക്കപ്പെട്ട
മസ്തിഷ്കങ്ങളിൽ
ഇഴയുന്നു
ഈ ഫുദ്ധിജീവിതം..!!
"മതവും മതചിഹ്നവും"
മത ചിഹ്നങ്ങൾ
വാരിപ്പുതച്ചവരുടെ
മദപ്പാടുകൾ
നോക്കിയാണ്
അവർ
മതങ്ങളെ
കല്ലെറിയുന്നത് !
ഓർക്കുക!,
എല്ലാ മനുഷ്യരും
ശരീരത്തിൽ
വിസർജ്ജ്യം
വഹിക്കുന്നവരാണ് !!
