നുറുങ്ങുകൾ -6

ഹൃദയ ഘടികാരം

ജീവിതത്തിന്റെ തുടിപ്പിൽ നിന്നും
മരണത്തിന്റെ കിടപ്പിലേക്കുള്ള
സമയദൈർഘ്യം,
ഹൃദയ ഘടികാരം
അനുനിമിഷം 
നമ്മോട് വിളിച്ചുപറയുന്നുണ്ട് !
*************************************

പല്ല് വേദന

ഒരു പല്ല് വേദന പോലും
ചില നേരം, മനുഷ്യനെ
പുല്ലു പോലെ
ചവിട്ടിയരക്കുന്നു !
******************

സങ്കടം

ക്ഷമിക്കുക,
എന്റെയും നിന്റെയും
സങ്കടം
നാം, കണ്ണീരിനെ
സാക്ഷിയാക്കി
ദൈവത്തിന്
കൊടുക്കുന്ന
കടമാണ് !
****************

നുറുങ്ങുകൾ- 7

ചതി

ചതിയുടെ
മെതിയടിക്കടിയില്‍ പെട്ട്
ചതഞ്ഞവരുടെ
ചിതയ്ക്കരുകില്‍
ചകിതനായി ഞാന്‍ !
****************************

നാവും കാതും

നാവ് മൂര്‍ച്ച കൂ‍ട്ടുന്നതിലല്ല, 
കാത് കൂര്‍പ്പിച്ചു വെക്കുന്നതിലാണു കാര്യം!
*************************************************

സ്വാതന്ത്ര്യം  

സ്വതന്ത്രരാണ് എന്ന് എല്ലാവരും പറയുന്നു,
ചലിക്കാൻ തുടങ്ങുമ്പോഴായിരിക്കും 
നമ്മെ ബന്ധിച്ചിരിക്കുന്ന
സമൂഹത്തിന്റെ 
അദൃശ്യമായ ചങ്ങലകൾ
നാം ശ്രദ്ധിക്കുന്നത് !

നുറുങ്ങുകൾ- 8

കാഴ്ച്ച

ഒരു കാഴ്ച്ചയും വെറുതെയല്ല, ഓരോ കാഴ്ച്ചകളിൽ നിന്നും നമുക്കായി കരുതി വെച്ച ഓഹരി നാം കണ്ടെത്തുന്നില്ലെന്ന് മാത്രം!.

അറിവ് 

അറിവ് വർദ്ധിക്കുന്തോറും ചോദ്യങ്ങൾ കുറയുന്നുണ്ട്. പക്ഷെ, സങ്കീർണ്ണതകൾ കൂടുന്നു. എങ്കിലും,കുനിഞ്ഞ ശിരസ്സിനാൽ മൌനിയായിരിക്കുമ്പോഴും ഉള്ളിൽ ചിന്തകളുരസിയുണ്ടാകുന്ന വിസ്ഫോടനങ്ങളുടെ ഊർജ്ജത്തിൽ നിന്നു തന്നെയാണ് നാം നമ്മെ പുതുക്കി പണിയുന്നത്.

ജീവിതപാഠം  

അസഹ്യമായത്, അസാധ്യമായത് എന്നൊക്കെ നമുക്കിപ്പോൾ തോന്നുന്ന ഒരു കാര്യത്തെ നേരിടാൻ, അതിനോടടുക്കുന്ന സമയവും സാഹചര്യവും നമ്മെ പ്രാപ്തമാക്കിയേക്കാം. കടുത്ത പരീക്ഷണങ്ങൾ നിറഞ്ഞ ജീവിതപ്രതിസന്ധികളെ അതിജീവിച്ചവരുടെ വിജയഗാഥകൾ മാനവ ചരിത്രത്തിലുടനീളം കാണാം, 
സ്നേഹിതാ, മരണമല്ലാത്ത അനുഭവങ്ങളൊന്നും അവസാനത്തേതല്ല!.

നുറുങ്ങുകൾ- 9

മരണം

നിറങ്ങൾ 
അണിഞ്ഞു നിന്നിരുന്ന
ജീവിതത്തിനു മേൽ
മരണം
വെള്ള പുതപ്പിക്കുന്നു !

*************************

ആഘോഷങ്ങൾ

പഴകിയ
ജീവിതത്തെ
കഴുകിയെടുക്കുന്നു
ആഘോഷങ്ങൾ !

**********************

യുക്തി

ശ്മശാനങ്ങളുടെ
മൂകസാക്ഷിത്വം
മാത്രം മതിയായിരുന്നു
നിഷ്പക്ഷതയുടെ
കോടതിക്ക് 
യുക്തിയെ
മരണം വരെ
തടവിന് ശിക്ഷിക്കാൻ !

നുറുങ്ങുകൾ - 10

വിധി

പ്രാപഞ്ചിക തത്വങ്ങളുടെ
സങ്കീർണ്ണമായ
സൂത്രവാക്യങ്ങൾ
ഗ്രഹിക്കുന്നതിലല്ല;

വിധി വിളയാട്ടങ്ങളുടെ
കെട്ടിപ്പിണഞ്ഞു കിടക്കുന്ന
കൂട്ടക്ഷരങ്ങൾ
വായിച്ചെടുക്കുന്നതിലാണ്
നാം പലപ്പോഴും
പരാജയപ്പെടുന്നത് !

************************

പ്രവാസി

പാളത്തിലോടുന്ന വണ്ടികൾക്കേ താളം കാണൂ;
ചൂളം വിളിച്ചില്ലെന്നും വരാം
അരുത് , കയറാൻ ശ്രമിക്കരുത്!,
ഇത് ഭാവിയിലേക്ക്
സ്വപ്‌നങ്ങൾ ചുമക്കുന്ന
ചരക്കു വണ്ടിയാണ് !

******************************

മനസ്സ് 

നിറഞ്ഞ
ഗ്യാലറിയിലെ
ആരവങ്ങൾക്കിടയിൽ
ആവേശത്തോടെ
ഉരുണ്ടുകളിക്കുന്നു

ചിലപ്പോഴോ,
ആർപ്പുവിളികൾക്കിടയിലും
തീർത്തും
ഒറ്റപ്പെട്ട്
കാറ്റൊഴിഞ്ഞു
മൂലയിലിരിക്കുന്നു !

****************************

നുറുങ്ങുകൾ - 11

ഏകാന്തത

ഏകാന്തത ദൈവത്തിലേക്കുള്ള 
ഒറ്റവരിപ്പാതയാണ്!.

*****************************************

അന്ധത

വെളിച്ചത്തിൽ നിന്നും ഇരുട്ടിലേക്ക് കയറുമ്പോൾ നാം പെട്ടെന്ന് അന്ധത ബാധിച്ചവരെ പോലെയാവുന്നു. 
ഒരല്പം ക്ഷമിക്കുക,കാഴ്ച്ച വീണ്ടും തിരികെ വരുന്നത് കാണാം. 
ഇതു പോലെ തന്നെയാണ് ദുഃഖാവസ്ഥയും ,ക്ഷമയുണ്ടെങ്കിൽ ജീവിതം വീണ്ടും തിരികെ വരുന്നത് നാം കാണാതിരിക്കില്ല!
*******************************************

യുക്തി

യുക്തിയുടെയും യുക്തിരാഹിത്യത്തിന്റെയും കുറുകെ കെട്ടിയ നൂൽപാലമാണ് ജീവിതം. മരണത്തിലേക്ക് വീഴും വരെ നാം അതിലൂടെ അങ്ങോട്ടും ഇങ്ങോട്ടും സഞ്ചരിച്ച് കൊണ്ടിരിക്കുന്നു!
********************************************

വിധി

വിധിയുടെ കാറ്റിനാൽ നിയോഗങ്ങളിൽ നിന്ന് നിയോഗങ്ങളിലേക്ക് ചലിച്ചുകൊണ്ടിരിക്കുന്ന അപ്പൂപ്പൻതാടികൾ നാം !

നുറുങ്ങുകൾ - 12

വിയോഗം

ആണ്ടൊന്നു കഴിഞ്ഞെന്ന് !,
തുണയില്ലാതൊരു വടിയും
കാവൽക്കാരനില്ലാതൊരു വരാന്തയും
ശ്രോതാവില്ലാതൊരു റേഡിയോയും
വിരഹത്തിലാണ്ടു പോയിട്ടുണ്ട് !

***************

വിധി

കാറ്റിനെയും
കൊടുങ്കാറ്റിനെയും
അതിജീവിച്ചു,
പക്ഷെ
ഉരുൾപൊട്ടലിൽ
വേരറ്റുപോയി !

***************

യുക്തി

യുക്തിയുടെ വിശാലമായ ആകാശത്തിലേക്ക്
പറന്നുയരുന്ന പല പട്ടങ്ങളും
പൊട്ടി വീഴുന്നത്,
ദൈവവുമായി ബന്ധിച്ച നൂലിഴ
അറ്റുപോകുമ്പോഴാണ് !
******************************

മതം

പരാതി പറയരുത്
സ്നേഹിതാ,
ചിലരിലെ മതം
പാതിയും പതയാണ് !